សូម​បង្ហាញពី​ធ្វើម្ហូបមួយមុខ​ដែល​ផ្សំ​ឡើង​ពីមីសួរ​ឲ្យប្រិយមិត្ត​ ស្គាល់ម្តង នោះគឺ ឆាមីសួរ​សាច់មាន់។ ដូច្នេះ​ដើម្បីកុំឲ្យខាតពេល​យូរ​សូមអនុវត្ត​តាម​ការ​ណែនាំខាងក្រោម៖

  

+ គ្រឿងផ្សំ

-​ សាច់មាន់ ៥០០ក្រាម​ហាន់តូច​ល្មម (ប្រឡាក់អំបិល និងម្រេចបន្តិច)

- ​មីសួរ ២ដុំកាត់ ៣-៤ថ្នាំងដៃ(ត្រាំទឹក)

- ត្រចៀកកណ្តុរ ១០០ក្រាមបេះតូចល្មម (ត្រាំទឹក)

- បង្គាក្រៀម ១០០ក្រាម (ត្រាំទឹក)

- ប្រេងខ្យង ១ស្លាបព្រាបាយ

- ស្ករស ១ស្លាបព្រាបាយកន្លះ

- ទឹកត្រី ១ស្លាបព្រាបាយ

- ម្សៅស៊ុបមាន់ កន្លះស្លាបព្រាបាយ

- ប៊ីចេង កន្លះស្លាបព្រាកាហ្វេ

- ខ្ទឹមបារាំង ១ចំហៀង​ផ្លែ

- ខ្ទឹមសចិញ្ច្រាំ ១ស្លាបព្រាបាយ

- ស្លឹកខ្ទឹម​ ៣ដើម​កាត់ ២ថ្នាំងដៃ

- ប្រេងឆា ៣-៤ស្លាបព្រាបាយ

 

+ វិធីធ្វើ

១. មុន​ដំបូង​យក​កូន​ចាន​មួយ​មក​លាយ​ ប្រេងខ្យង, ស្ករស, ទឹកត្រី, ម្សៅស៊ុបមាន់ និងប៊ីចេង កូរ​ចូល​គ្នា​ឲ្យសព្វ។

២. ​យក​ប្រេង​ឆា​ដាក់​ចូល​ក្នុង​ខ្ទះដាក់​ភ្លើង​ឲ្យ​ក្តៅដាក់​ខ្ទឹម​ស​ចូល​ឆា​ឲ្យ​ឈ្ងុយចាំដាក់​សាច់​មាន់​​ចូល​(សាច់​ប្រឡាក់)។

៣. បន្ទាប់​មក​ឆា​ឲ្យ​សាច់​រាង​ឆ្អិន​បន្តិច​​ចាំ​ដាក់​បង្គា​ក្រៀម, គ្រឿង​ផ្សំ​ក្នុង​កូន​ចាន, ត្រចៀកកណ្តុរ​ រួច​ឆា​ចូល​គ្នា​ថែម​ទឹកបន្តិច។

៤. ទុក​​វាឲ្យ​​ពុះ​ដាក់​មីសួរ​, ខ្ទឹមបារាំង, និង​ស្លឹកខ្ទឹម​​ឆា​ចូល​គ្នា​ឲ្យ​ចូល​គ្រឿង​សព្វជា​ការ​ស្រេច៕​